21.卑劣街頭 (第6/10页)

o姐，我以前...都未試過喎...」走在末尾那位放慢速度，對大姐頭介紹的私鐘生意夷猶不決。

    前者轉身交臂，斜睨她一記眼刀，秾豔梅唇輕吹穢霧：「面都紅晒，怕醜啊？你唔係話你等錢使咩？」

    「係啊，睇中個煲袋...又想買萬寶路牛仔褲...」

    「咪係囉，自己搵錢買嘢咁先叻女，費事問親老竇攞錢都鬧你。」Bobo伸手捏揉女仔發育中仍顯幼孺的胸部，紫紅尖甲摁勒下凸露微巧外廓，羞得她向後瑟縮：「你咁好身材，嫩口兼彈手，大把水等你搵，一次生兩次熟，三次大結局，做做下就慣，到時唔扑嘢先身痕啊~」

    「信我啦，讀書寫字尋死路，溝仔打交有前途。學晒我D嘢，包你同我一樣戴亞米加返學幾撚威。」

    正教良言棄如敝履，歪理邪說頭頭是道。

    另一名女仔含着溜鬚拍馬的口氣趁熱打鐵：「你咪再十五十六諗嚟度去，Bobo姐手頭上D客人質素高到你唔信，你話你去邊可以搵到咁好嘅米路？」

    「仲有做我嘅靚，以後響學校掛我朵，冇人恰你。」

    語夾話攻釋放毒療虐焰，循循勸誘到底無施不效。

    「係嘅係嘅...」女仔不住點頭，向貪婪屈膝拜降，笑貧不笑娼的年代不能活得眼闊荷包窄，一時貞操值幾蚊，一世有錢吃得開。

    「就咁話啦，聽日出埋call機，隨時開工。」

    「知道啦Bobo姐，咁我走先，byebye！」

    新紮跟班雀躍離去，太妹洋洋得意於自身風範，誰叫條仔大佬是和興和紅棍威哥，威風煞勢從觀塘一路刮遍東南全校，憑姿色沾光，前吆後喝無敢不從，16、7歲就做人上人，將來說不定勁過洪興砵蘭街十三妹，黑白兩道揚名立萬。

    她舉止浮誇地抬腕瞟了眼OMEGA，撇嘴埋怨：「挑！都已經四點啦Albert嗰條仆街仲未蒲頭。」

    「Bobo姐今晚想去邊wet？帶埋我一齊啦！」

    「wet你老味啊，你屎枚爛猜唔飲得，上次喺老蘭劏白鶴仲爭D畀人執死屍...」

    話未盡便留意到前方廿來米處，男友泊停的嶄新電單上坐着陌生人影，遠遠觀察體型，女人。

    她疑竇叢生，死仔遲到半粒多鐘沒出現，難不成結交了新歡公然攤牌...

    年輕，受窮受教，受不了條仔變心，受不了一腔頂點的驕妄瞬間跌落崖底，當下柳葉眉恣兇橫連，敏感無名妒火奔騰，邁開二叔公剃頭的步履前往問罪。

    數秒衝刺路程的距離內已將女人外形怒瞪了個八九不離十，黑褲黑衫短打皮褸，撐持雙肘傾身伏背，昂首定望，非驚非怪不動如山，